為何我建議買Porte / Spade 一定要 G 版？咁先要了解各版本之分別，附圖已清楚圖列各版本才有的設備，我簡單文述最主要幾點：
G 版：
前座隔熱防 UV 玻璃
恒溫冷氣系統附負離子空氣淨化
真皮軚盤
所有 F 版有既野
F 版：
後排 6:4 分割座椅
3 電鍍冷氣旋鈕圈
司機位後面紙巾位
司機位手抌
Y 版：
和 F 版一樣，不過前排改了為一排底設計
X 版：
後排沒有 6:4 分割
3 冷氣旋鈕圈沒有電鍍
V 版：
沒有防水座椅布料
1.3 引擎
香港可以買到既 Spade / Porte 主要是 G、F、Y 和少量的 X，而行貨既 Spade 就是 G 版；所以在選購水貨車時要格外留意之間既分別，以本人觀察所得，水貨車以 G 和 F 版最多，各佔 40% 左右，那為何我會建議買 G 版呢？
睇圖其實都知點解，前排的防 UV 隔熱玻璃和恆溫冷氣系統；以日本當時新車賣價為例，G 版比 F / Y 版貴 100,000 日元，即約六千至七千港幣，以上兩樣野在香港用這價錢是改不到的 (玻璃勉強算可以)，而這防 UV 玻璃也有更好的隔音效果，外面還有潑水處理，即是雨水會更易成水珠吹走；實際使用時，其隔熱效果也非常明顯，正午太陽曬住，右手被太陽直射下明顯無咁熱，這是用我架 BMW 3 系司機位作對比，也有效令車廂無咁熱，而隔音效果也比非 G 版明顯較好。另一樣恆溫冷氣就令冷氣操作使用更方便，調去理想溫度就自動保持，最重要是有負離仔空氣淨化，有鼻敏感者尤其好。
係唔係真正 G 版睇有無恆溫冷氣就得，至於軚控係出車時 option，G 版車主無加錢就無，所以不是睇係唔係 G 版的方法。在此講少少關於 X 版，豐田通常會把齋版既車型定為 X 版，只會有基本功能，大多非必要既功能都無，當時 X 版的 Spade Porte 比 F / Y 版要便宜 50,000 日元，俾 budget 有限的買家選擇，X 版機器性能上和 G F Y 無分別，不過裝備上真係無晒，連後排 6:4 分割都無，如果唔係平好多都唔建議買 X 版，還有一點，X 版好多時係俾租車公司買去的，行駛里數一定好高也是潛在隱憂。
P.S. 我睇番日本賣單，恆溫冷氣 (66,000 日元)和隔熱玻璃 (22,000 日元) 係可以在出車時附加在 F Y X V 車型上，但價錢已和出架 G 版相差唔遠，所以應該唔會太多人去買架 F 版加錢改恆溫和換玻璃吧？

未提供相片說明。